Jauhar Deobandi
gora mukhḌa gore gaal
us pe qayamat bikhre baal
kis din hoga un se milna
dekh nujumi meri faal
hijr men tere jan-e-tamanna
ek ik pal hai sau sau saal
ghair hain ghere un ko har dam
kaise gale phir apni daal
ek nazar hai dil ki qimat
kitna hai ye sasta maal
aaj hai saaqi mauj men pi le
baat na us ki zahid Taal
haath na rangiye aap hina se
ḳhuun se mere kiije laal
dekh ke rahna baagh men bulbul
liye shikari phirte jaal
rokega har tiir ko tere
siine mera ban kar Dhaal
un pe aa kar chha.i javani
mujh pe ghar kar aaya kaal
tauba tauba mast javani
allah allah banki chaal
koi nahin hai jag men apna
kis ko suna.en dil ka haal
jiine ka jo lutf hai lena
gham ki bulbul dil men paal
ghairon ka to kaam hai jalna
baat pe un ki miTTi Daal
sun kar mere miThe sher
Tapke ‘jauhar’ sab ki raal
Leave a Reply