zamin ke saare manazir se kaT ke sota huun
main asman ke safar se palaT ke sota huun
main jam.a karta huun shab ke siyahi qatron ko
ba-vaqt-e-sub.h phir un ko palaT ke sota huun
talash dhuup men karta huun saara din ḳhud ko
tamam-rat sitaron men baT ke sota huun
kahan sukun ki shab-o-roz ghumna us ka
zara zamin ke mehvar se haT ke sota huun
tire badan ki ḳhalaon men aankh khulti hai
hava ke jism se jab jab lipaT ke sota huun
main jaag jaag ke raten guzarne vaala
ik aisi raat bhi aati hai DaT ke sota huun
Leave a Reply