Dukhati Hai Dil Phir Mohabbat Kisi Ki

dukhati hai dil phir mohabbat kisi ki

ki ankhon men phirti hai surat kisi ki

na puchho ye hain sikka-e-dagh kis ke

ye daulat mili hai badaulat kisi ki

pur-arman ahbab duniya se utthe

falak ne nikali na hasrat kisi ki

ye aalam hai apna ki kahta hai aalam

ilahi na ho aisi halat kisi ki

ajab be-muravvat se paala pada hai

kahan tak kare koi minnat kisi ki

uda le gai sarv se qumriyon ko

qayamat hai buuta si qamat kis ki

main is dil ka sathi nahin ashiqi men

bala meri le sar par aafat kisi ki

nazar men hain yaran-e-rafta ke jalse

khush aati nahin mujh ko sohbat kisi ki

vo kya din the ai dil tujhe yaad hai kuchh

vo meri khushamad vo nakhvat kisi ki

bahut bad hai ai ishq sarkar tere

na izzat kisi ki na hurmat kisi ki

shikanje men rahta hai dil aadmi ka

khuda band rakkhe na hajat kisi ki

kahe mujh ko jo jis ka ji chahe lekin

kabhi mujh se hogi na ghibat kisi ki

abas ‘bahr’ marte ho tum har kisi par

mubarak nahin tum ko chahat kisi ki

Leave a Comment