dard ko kitna chain mila hai parvanon ki mahfil men
charagari dam toḌ ga.i hai na-danon ki mahfil men
apnon ki mahfil men dil par tanz ke nashtar barse hain
kis darja iḳhlas mila hai beganon ki mahfil men
aaj vafa par zikr karenge ahl-e-ḳhirad se divane
aaj junun ki sham.a jalegi farzanon ki mahfil men
ab ke ham bhi vahshat-e-dil ko bahlane le ja.enge
ab ke baharen raqs karengi viranon ki mahfil men
chand ki kirnon ki bahon men sone vaale jaag uThen
halchal mach jaa.e na mere armanon ki mahfil men
ham saudagar ashk-e-vafa ke kaun hamen pahchanega
kaun haqiqat ko samjhega afsanon ki mahfil men
dar-dar ham ne Thokaren kha.in dair-o-haram bhi ghuum aa.e
‘raje’ magar insan mile hain paimanon ki mahfil men
Leave a Reply