Athar Nasik
main tujhe bhulna chahun bhi to na-mumkin hai
tu miri pahli mohabbat hai mira mohsin hai
main use sub.h na janun jo tire sang nahin
main use shaam na manun ki jo tere bin hai
kaisa manzar hai tire hijr ke pas-e-manzar ka
reg-e-sahra hai ravan aur hava sakin hai
teri ankhon se tire hathon se lagta to nahin
mere ahbab ye kahte hain ki to kamsin hai
abhi kuchh der men ho ja.ega angan jal-thal
abhi aghaz hai barish ka abhi kin-min hai
ain mumkin hai ki kal vaqt faqat mera ho
aaj muTThi men ye aaya hua pahla din hai
aaj ka din to bahut ḳhair se guzra ‘nasik’
kal ki kyuun fikr karun kal ka ḳhuda zamin hai
Leave a Reply