Hasan Shahnawaz Zaidi
aao phir mil jaa.en sab baten purani chhoḌ kar
ja nahin sakte kahin dariya ravani chhoḌ kar
vo mire kaase men yaden chhoḌ kar yuun chal diya
jis tarah alfaz jaate hon ma.ani chhoḌ kar
tum mire dil se ga.e ho to nigahon se bhi jaao
phir vahan Thahra nahin karte nishani chhoḌ kar
ab suna hai aam shahri ki tarah phirte ho tum
kya mila hai mere dil ki hukmarani chhoḌ kar
bas abhi tufan-e-gham ka tazkira aaya hi tha
sab gharon ko chal diye meri kahani chhoḌ kar
is tarah mere qabile men kabhi hota nahin
kaise ja.un tere gham ki mezbani chhoḌ kar
ye kalam-ul-lah kab hai jo sada baaqi rahe
dar-e-fani se chale hain naqsh-e-fani chhoḌ kar
Leave a Reply