Saleem Faraz
har-chand mira shauq-e-safar yuun na rahega
kya ḳhaar sar-e-rahguzar yuun na rahega
mumkin hai tiri yaad sulagti rahe ta-umr
ye sho.ala sharar-bar magar yuun na rahega
is dhuup men meri bhi jhulas ja.engi ankhen
tera bhi ruḳh-e-ghuncha-e-tar yuun na rahega
mauqa hai gul-o-barg saja lo sar-e-mizhgan
har fasl men sarsabz shajar yuun na rahega
kuchh sher raqam karte chalo lauh-e-junun par
har daur men ye kar-e-hunar yuun na rahega
kuchh log mire ba.ad bhi rah ja.enge lekin
sahra men koi ḳhak-ba-sar yuun na rahega
ḳhush aa.e ‘salim’ aaj use meri asiri
kal tak magar afsun ka asar yuun na rahega
Leave a Reply