ye ashk aankh men kis justuju ke saath aa.e
ki tere zikr tiri guftugu ke saath aa.e
main ek naḳhl tha yak-rangi ḳhizan ka asiir
ye saare rang tiri aarzu ke saath aa.e
jo kho ga.e the kahin umr ke dhundlakon men
vo aks phir kisi a.ina-ru ke saath aa.e
farogh-e-nasha-e-mai se bhi ji bahal na saka
bahut se gham the jo mauj-e-subu ke saath aa.e
gila na kar jo sar-e-shahr ju-e-ḳhun hai ravan
ki inqalab jab aa.e lahu ke saath aa.e
ga.e to sirf mata-e-sukut le ke ga.e
jo is nagar men baḌi hav-hu ke saath aa.e
‘farasat’ ahl-e-jahan ham-safar hain ḳhushiyon ke
maqam-e-ranj talak kab kasu ke saath aa.e
Leave a Reply