guzarne ko to ‘shariq’ apni har aalam men guzri hai
vahi hai zindagi lekin jo un ke gham men guzri hai
vo uftad-e-ḳhizan ho ya baharon ki junun-ḳhezi
qayamat hai pe sach puchho to har mausam men guzri hai
vo koi aur honge ḳhvahish-e-amn-o-sukun vaale
yahan to umr saari kavish-e-paiham men guzri hai
na puchh ai ham-nashin kya sanahe guzre mohabbat men
use kuchh dil samajhta hai ki jis aalam men guzri hai
mujhe jaise do-alam mil ga.e jab mil ga.i ‘shariq’
vo ik saa.at mohabbat ki jo us ke gham men guzri hai
Leave a Reply