vo sar-e-sham ga.e hijr ki hai raat shurua
ashk jaari hain hua mausam-e-barsat shurua
jazba-e-dil ne mire kuchh to kari hai tasir
phir hue un ke jo altaf-o-inayat shurua
mujh ko dikhlao na tum rang-e-hina us ko jalao
bhejni jis ne kari tum ko ye saughat shurua
kabhu vahshat kabhu shiddat kabhu gham ki kasrat
ki jo pahle the hue phir vo hi halat shurua
log nazron pe chaḌhate hain ḳhuda ḳhair kare
phir na.e sar se hai ki us ne mulaqat shurua
hijr ki shab ye qayamat hai kaTi ai ‘tanvir’
sub.h ho jaa.e karo aisi koi baat shurua
Leave a Reply