arz-e-mudda.a karte kyuun nahin kiya ham ne
ḳhvahishon ko hasrat men ḳhud badal diya ham ne
nit na.i umidon ke Taank Taank kar paivand
zindagi ke daman ko umr-bhar siya ham ne
ranj-o-gham uTha.e hain fikr-o-fan bhi paa.e hain
zindagi ko jitna bhi ji sake jiya ham ne
sub.h ka naya suraj kuchh to raushni lega
shaam se jalaya hai aas ka diya ham ne
dagh-e-dil ki zardari muft haath kab aa.i
ḳhaak ho ke paaya hai raz-e-kimiya ham ne
Leave a Reply