Dil Hai Raushan Ki Hai Dil Mein ruKH-E-Raushan Un Ka

dil hai raushan ki hai dil men ruḳh-e-raushan un ka

zer-e-fanus-e-badan sham.a hai joban un ka

diid un ki hai visal un ka tasavvur un ka

jaan un ki hai jigar un ka hai tan-man un ka

hain vo kashana-e-dil men kabhi ankhon men kabhi

ḳhana tan hai mira ghar bhi aur angan un ka

hai tasavvur jo unhin ka to vo hain pesh-e-nigah

ho ḳhayal un ke siva gar to hai rahzan un ka

hain tumhin men vo tum apne ko to dekho ho kaun

jin ko kahte ho ki hai arsh pe maskan un ka

jaan un ki hai har ik jaan kahan par vo nahin

donon aalam men yahi ramz hai muzman un ka

baiThe baiThe vo kiya karte hain har gul pe nazar

dil-e-ashiq hai magar sair ka gulshan un ka

vo hamare hain ham un ke hain unhin ka ye zuhur

jaan un ki hai yahi jaan bhi tan-man un ka

aa ke ghar men mire ‘mardan’ na vo jaane paa.en

ta-qayamat na chhuTe haath se daman un ka