chhupa.e dil men ham akasr tiri talab bhi chale
kabhi kabhi tire hamrah be-sabab bhi chale
numud-e-gul ke karishme sada jilau men rahe
nasim ban ke chale ham chaman men jab bhi chale
jalao ḳhun-e-shahidan se irtiqa ke charagh
ye rasm chalti rahi hai ye rasm ab bhi chale
suna hai jada-navardan-e-sub.h ke hamrah
ba-faiz-e-vaqt ka.i rah-ravan-e-shab bhi chale
hai shor-e-shabnam-e-asudgi ke dosh-ba-dosh
gul aaj le ke kahin shola-e-ghazab bhi chale
kisi ka hukm-e-zaban-bandi-e-junun bhi chala
kisi ke qisse suḳhan ban ke zer-e-lab bhi chale
hamin ne saghar-e-gham muntaḳhab kiya ‘arif’
vagarna bazm men kuchh saghar-e-tarab bhi chale
Leave a Reply