Najma Shaheen Khosa
ai ishq is qafas se mujhe ab riha.i de
dekhun jidhar mujhe tira jalva dikha.i de
shahar-e-shab-e-firaq ke gahre sukut men
apni sada mujhe bhi kabhi to suna.i de
yad-e-habib mujh ko bhi ab mujh se kar juda
mujh ko hujum-e-dard men meri ikaa.i de
kab se main ḳhamushi ke nagar men muqim huun
lekin ye kaun hai jo yahan bhi suna.i de
zulmat-zadon ko jada-o-manzil ki kya ḳhabar
tarik raston men bhala kya sujha.i de
qatre men maujzan hai samundar hi har jagah
ab vo mujhe faraz-e-ufuq tak rasa.i de
maqtal men kaise chhoḌ ke rahen badal gaya
yarab kisi sanam ko na aisi ḳhuda.i de
Leave a Reply