Safar Pe Jaise Koi Ghar Se Ho Ke Jata Hai

safar pe jaise koī ghar se ho ke jaatā hai

har aabla mire andar se ho ke jaatā hai

jahāñ se chāhe guzar jaa.e mauja-e-ummīd

ye kyā ki mere barābar se ho ke jaatā hai

junūñ kā pūchhiye ham se ki shahr kā har chaak

isī dukān-e-rafūgar se ho ke jaatā hai

maiñ roz ek zamāne kī sair kartā huuñ

ye rāsta mire bistar se ho ke jaatā hai

hamāre dil meñ havāle haiñ saarī yādoñ ke

varaq varaq isī daftar se ho ke jaatā hai

Leave a Comment