safar pe jaise koi ghar se ho ke jaata hai
har aabla mire andar se ho ke jaata hai
jahan se chahe guzar jaa.e mauja-e-ummid
ye kya ki mere barabar se ho ke jaata hai
junun ka puchhiye ham se ki shahr ka har chaak
isi dukan-e-rafugar se ho ke jaata hai
main roz ek zamane ki sair karta huun
ye rasta mire bistar se ho ke jaata hai
hamare dil men havale hain saari yadon ke
varaq varaq isi daftar se ho ke jaata hai
Leave a Reply