Pi Pi Ke Jagmagae Zamane Guzar Gae

pi pi ke jagmagae zamane guzar gae

raton ko din banae zamane guzar gae

jan-e-bahar phuul nahin aadmi huun main

aa ja ki muskurae zamane guzar gae

kya laiq-e-sitam bhi nahin ab main dosto

patthar bhi ghar men aae zamane guzar gae

o jaane vaale aa ki tire intizar men

raste ko ghar banae zamane guzar gae

gham hai na ab ḳhushi hai na ummid hai na yaas

sab se najat paae zamane guzar gae

marne se vo Daren jo ba-qaid-e-hayat hain

mujh ko to maut aae zamane guzar gae

kya kya tavaqquat thiin aahon se ai ‘ḳhumar’

ye tiir bhi chalae zamane guzar gae

Leave a Comment