Kitni Mushkil Se Usko DhunDa Hai

kitnī mushkil se us ko DhūñDā hai

be-sabab dil kahāñ ye TuuTā hai

achchhī sūrat kā kyā kareñ charchā

achchhī ḳhushbū se phuul biktā hai

us ke bachchoñ kī aisī sīrat hai

vaise īñTeñ haiñ jaisā ḳhāñcha hai

us ke va.ade kī kyā maiñ baat karūñ

kachchā dhāga bhī us se pakkā hai

terī zulfoñ se bas rihā ho kar

maiñ ne pinjre kā dard samjhā hai

jab maiñ phūloñ ko pyaar kartā huuñ

mujh ko titlī se pyaar miltā hai

pahle mahñgī thī pyaar kī daulat

ab to daulat se pyaar sastā hai

us kī fitrat meñ baat aisī hai

jo burā hai to vo bhī achchhā hai

dekhne vaalā ho agar ‘āqib’

zaḳhm āñkhoñ meñ dekh saktā hai

Leave a Comment