Gulzar Dehlvi
ya mila qaum ko ḳhud apna nigahban ho kar
sau tarah dekh liya ham ne pareshan ho kar
kafir-e-ishq hi achchhe the sanam-ḳhanon men
shan-e-iman na mili sahab-e-iman ho kar
naqs-e-tanzim se ho tark-e-chaman kya ma.ani
ham ko rahna hai yahin tar-e-rag-e-jan ho kar
kya hua gar koi hindu ki musalman Thahra
adamiyat ka nahin paas jo insan ho kar
ham bujhen bhi to bujhen misl-e-charagh-e-sahari
aur jo raushan hon to hon sham-e-shabistan ho kar
dil men ahbab ke ham ban ke asar baiThenge
aur uThenge isi gulshan se baharan ho kar
kya gulistan men naya hukm-e-zaban-bandi hai
baghban bhi hua sayyad-e-nigahban ho kar
sidq niyyat se agar us ki chaman-bandi ho
phir rahe kyuun na vatan mulk-e-suleman ho kar
ab ham apne liye ḳhud sud-o-ziyan sochenge
ham ko jiina hi nahin banda-e-ehsan ho kar
rashk-e-gulzar-e-iram arz-e-vatan jab hogi
apne begane basen sumbul-o-raihan ho kar
Leave a Reply