Poet
har shajar ke ta.iin hota hai samar se paivand
aah ko kyuun nahin hota hai asar se paivand
dekhna zor hi ganTha hai dil-e-yar se dil
sang-o-shishe ko kiya hai main hunar se paivand
mizha-e-ḳhun-e-dil aluda pa ye hai qatra-e-ashk
yuun hai jyuun shaḳh ho marjan ki guhar se paivand
mil raha hai tire aariz se ḳhat-e-murcha ye
jaise a.ine ke jauhar ho jigar se paivand
sozish-e-ashk se ma.alum ye hota hai mujhe
qatra-e-ab bhi hota hai sharar se paivand
thaan zarbaft ke hote the jahan qat.a ‘huzur’
jin ki poshak sada hoti thi zar se paivand
ab phaTa jaama gazi ka nahin gar hai bhi koi
tu nikale ko nikalta nahin ghar se paivand
Leave a Reply