mauj-e-reg sarab-e-sahra kaise banti hai
bahta hua a.ina-e-dariya kaise banti hai
khil ke kali chup kyuun rahti hai shaḳh-e-zar-afshan par
phir ye chahakti kokti chiḌiya kaise banti hai
bahar ke manzar bhi hasin kyuun lagne lagte hain
dil ki lahr ik kaif-e-sarapa kaise banti hai
aansu se kitna gahra hai miTTi ka rishta
duniya phir gham se begana kaise banti hai
uḌte hue patton ki sada ye shor havaon ka
jangal ki ye faza sannaTa kaise banti hai
main to chaak pe kuza-gar ke haath ki miTTi huun
ab ye miTTi dekh khilauna kaise banti hai
bah gaya mera gharaunda to ik rele hi men ‘zeb’
paani par qaa.em ye duniya kaise banti hai
Leave a Reply