dil bahalne ka jahan men koi saman na hua
apna hamdard kabhi alam-e-imkan na hua
shikva-e-hijr na bhule se bhi aaya lab par
ru-ba-ru un ke main ḳhud-karda pasheman na hua
ham-nashin puchh na hal-e-dil-e-nakam-e-azal
yahi hasrat rahi puura koi arman na hua
be-ḳhudi men ye hai aalam tire divanon ka
fasl-e-gul aa.i magar chaak gareban na hua
koi kya jaane ki kya lutf ḳhalish hai hasil
mera hi dil hai ki minnat-kash-e-darman na hua
yuun to hamdard zamana tha ba-zahir lekin
kisi surat se ilaj-e-gham-e-pinhan na hua
be-dhaḌak jaane ki himmat na hui mahshar men
munh chhupane ke liye dast-ba-daman na hua
dil bahalta bhi to kis tarah bahalta shab-e-gham
saz-o-saman na hua naghma-ehirman na hua
pursish-e-hal pe ankhon men bhar aa.e aansu
aise majbur hue zabt bhi asan na hua
zarre zarre se ayaan husn ki ra.ana.i hai
vo hasin tu hai ki pardon men bhi pinhan na hua
main tha mushtaq tire jalve ka ai maya-e-husn
rah ke parde men bhi to sho.ala-e-uryan na hua
chain se qaid ta.ayyun men basar ki ai ‘shauq’
dil bhi jam.iyat-e-ḳhatir se pareshan na hua
Leave a Reply