sub.h se aur miyāñ shaam se kyā miltā hai
ye hai duniyā yahāñ ārām se kyā miltā hai
tū kisī shahr kā mālik hai to hogā mirī jaan
ye batā mujh ko tire naam se kyā miltā hai
jab ġhalat kaam karegā tabhī shohrat hogī
terī bastī meñ sahī kaam se kyā miltā hai
saath chal jaam uThā muñh se lagā pī to zarā
mujh se kyā pūchhtā hai jaam se kyā miltā hai
chand sikkoñ ke evaz jism milā karte haiñ
aur is shahr meñ kam daam se kyā miltā hai
vasl se miltā hai jo miltā hai dīvāne ko
ai ḳhudā hijr ke ayyām se kyā miltā hai