ḳhatm hoga ab safar pesh-e-nazar hai ru-e-dost
aa rahi hai aaj ki manzil se mujh ko bu-e-dost
aage aage hasraten ….aur pichhe pichhe main chala
is tarah ghar se nikal kar ja raha huun su-e-dost
pahle to dil ne jigar ki jaan na-qadri se li
DhunDhta phirta hai aalam bhar men ab pahlu-e-dost
vah-ri qismat ki gardun par sahar hone lagi
go paḌe the mere baazu par abhi gesu-e-dost
ḳhud-baḳhud meri rag-e-gardan phaḌak uThti hai aaj
kar raha hai koi zikr-e-quvvat-e-bazu-e-dost
lafz jo dil ki talab men tha vo bilkul sehr tha
baton hi baton men mujh par chal gaya jadu-e-dost
koi divana chala hai hashr men is vaz.a se
chaak ta-daman gareban munh pe ḳhak-e-ku-e-dost
dil se mujh ko saaf saaf aḳhir ye kah dena paḌa
ab vahi saḳhti bhi jhele jo bigaḌe ḳhu-e-dost
ho agar zinda tum ai ‘alim’ to ab hoshyar ho
kab talak soya karoge thak gaya zanu-e-dost
Leave a Reply