akhtar-hoshiyarpuri

Thi Titliyon Ke Taaqub Mein Zindagi Meri

thi titliyon ke ta.aqub men zindagi meri

vo shahr kya hua jis ki thi har gali meri

main apni zaat ki tashrih karta phirta tha

na jaane phir kahan avaz kho gai meri

ye sarguzisht-e-zamana ye dastan-e-hayat

adhuri baat men bhi rah gai kami meri

hava-e-koh-e-nida ik zara Thahar ki abhi

zamana ghaur se sunta hai an-kahi meri

main itne zor se chiḳha chaTaḳh gaya hai badan

phir is ke ba.ad kisi ne nahin suni meri

ye darmiyan ka ḳhala hi mira nahin varna

ye asman bhi mera zamin bhi meri

kise ḳhabar ki guhar kaise haath aate hain

samundaron se bhi gahri hai ḳhamushi meri

koi to aae mire paas do ghaḌi baiThe

ki kar gai mujhe tanha ḳhud-agahi meri

kabhi kabhi to zamana raha nigahon men

kabhi kabhi nazar aai na shakl bhi meri

mujhe ḳhabar hai kahan huun main kaun huun ‘aḳhtar’

ki mere naam se surat giri hui meri

More Poems

Leave a Comment