dast-e-shabnam pe dam-e-sho.ala-nava.i na rakho
sub.h ki god men shab bhar ki kama.i na rakho
meri yadon ke sanam ḳhanon se uThne do dhuan
mere siine pe abhi dast-e-hina.i na rakho
jaag jaa.e na kahin husn ka sota pindar
dida-e-shauq men andaz-e-gada.i na rakho
shab ko rahne do yuun hi sham-o-sahar ka paivand
Dar ke zulmat se buniyad-e-juda.i na rakho
husn bhi apne taqazon se hai aḳhir majbur
husn ke dosh pe ilzam-e-ḳhuda.i na rakho
phir kisi taur sameTo ye bikharte hue rang
yuun pareshan tasavvur ki ikaa.i na rakho
apne vijdan se bhi kaam nikalo koi
rahbar hi ke liye rah-numa.i na rakho
apne zaḳhmon ko chhupao kisi unvan ‘samad’
rahguzaron men gham-e-abla paa.i na rakho
Leave a Reply