Poet
hosh-o-havas jab se hamare chale ga.e
jo yar-e-gham-gusar the saare chale ga.e
ai charagar vo dekh tire dar se na-murad
bimar-e-ishq yaas ke maare chale ga.e
ehsan naḳhuda ka uThana tha nagavar
us paar ham ḳhuda ke sahare chale ga.e
is be-ḳhudi ki ḳhair tiri justuju men ham
apna hi naam aap pukare chale ga.e
dil men liye shikayat-e-be-mehri-e-jahan
jaur-o-jafa ke dard ke maare chale ga.e
hosh-o-havas tab-o-tavan zauq-e-bandagi
ham se ye zindagi ke sahare chale ga.e
duniya se jab ravana hue ham gunahgar
sar munh chhupa.e sharm ke maare chale ga.e
‘azam’ palaT ke aa.en vo mumkin kahan bhala
asudgi men din jo guzare chale ga.e
Leave a Reply