Qayyum Nazar
suraj ki kiran ka sho.abada hai
rang-e-ruḳh-e-zard uḌ gaya hai
naqsh-e-kaf-e-pa ne gul khila.e
viran kahan ab ye rasta hai
jaag uTThi hain zindagi ki rahen
shayad koi chand ko gaya hai
sholon se hua tha baagh ḳhali
phir sina-e-gul bhaḌak uTha hai
patte patte ka rang badla
badli badli hui faza hai
pahle to na yuun kabhi hua tha
tu bhi mujhe dekh kar hansa hai
beganagi ne ye raaz khola
tu mera azal se ashna hai
shabnam sar-e-nok-e-ḳhar yaani
lab pe mire harf-e-mudda.a hai
har dard nahin dava ka muhtaj
yuun bhi to ilaj-e-gham hua hai
tera hi rahega bol-bala
dil mera abas dhaḌak raha hai
Leave a Reply