Ibn-e-Adam Barsar Paikar Hai

Ahmad Ali Barqi Azmi

ibn-e-adam barsar paikar hai

garm zulm-o-jaur ka bazar hai

dandanate phir rahe hain shar-pasand

kaun akhir is ka zimmedar hai

bo raha hai bughz va nafrat ke vo biij

jis ki apni zehniyat bimar hai

hai aziiz apna use shakhsi mafad

maslahat-bin aaj ka fankar hai

khun-e-insan ki tijarat ke liye

jis ko apna faeda darkar hai

karta hai barham nizam zindagi

sirf mal-o-zar se us ko pyaar hai

dekh kar chaliye zara dam-e-fareb

vo shikari darpai-e-azar hai

rakhiye gird-o-pesh par apne nazar

gul ke pahlu men vo dekhen khaar hai

jis ki nazron men barabar hon sabhi

mulk-o-millat ka vahi meamar hai

haq ne di hai aap ko vo aql-e-kul

jo mohabbat ki alam-bardar hai

aao mil-jul kar use ham tai karen

zindagi ka jo safar dushvar hai

bhaai chare ki faza qaaem karen

aap ka ‘barqi’ yahi gham-khvar hai