Noor Jahan Sarwat
pyaas jo bujh na saki us ki nishani hogi
ret par likkhi hui meri kahani hogi
vaqt alfaz ka mafhum badal deta hai
dekhte dekhte har baat purani hogi
kar gai jo miri palkon ke sitare raushan
vo bikharte hue suraj ki nishani hogi
phir andhere men na kho jaae kahin us ki sada
dil ke angan men nai shama jalani hogi
apne khvabon ki tarah shakh se tuute hue phuul
chun rahi huun koi tasvir sajani hogi
be-zaban kar gaya mujh ko to savalon ka hujum
zindagi aaj tujhe baat banani hogi
kar rahi hai jo mire aks ko dhundla ‘sarvat’
main ne duniya ki koi baat na maani hogi
Leave a Reply