Anjum Saleemi
main ḳhud ko mismar kar ke malba bana raha huun
yahi bana sakta huun lihaza bana raha huun
kisi ke siine men bhar raha huun main apni sansen
kisi ke katbe ko apna katba bana raha huun
bahut bhali lagti hai use bhi miri udasi
ḳhushi ḳhushi ḳhud ko dil-girafta bana raha huun
hujum ko mere qahqahon ki ḳhabar nahin hai
bana hua huun ki main tamasha bana raha huun
har ek chehre pe ḳhal-o-ḳhad ki numa.ishen hain
main ḳhal-o-ḳhad ke baghair chehra bana raha huun
khuli hui hai jo koi asan raah mujh par
main us se haT ke ik aur rasta bana raha huun
falak se uupar bhi ek chhat hai zamin aisi
falak ke us paar ek ziina bana raha huun
miri tavajjoh bas ek nuqte pe murtakiz hai
main apni quvvat ko ek zarra bana raha huun
Leave a Reply