mere mah-jabin ne ba-sad-ada jo naqab rukh se utha diya
jo suna na tha kabhi hosh men vo tamasha mujh ko dikha diya
mila shab jo khvab men vo hasin ye kaha tha niklegi hasraten
ye jafa ye bad-e-sahar ne ki chali yuun ki mujh ko jaga diya
main agarche khaak men mil chuka magar un ke dil men ghubar tha
ki nishan-e-qabr bhi dhundh kar mere sang-e-dil ne mita diya
chhute qaid-e-dair-o-haram se ham hue khvab vo jo khayal the
mujhe saqiya mai-e-be-khudi ka vo jaam tu ne pila diya
tujhe dekh o but-e-khush-ada phiri aankh saari khudai se
vo jo yaad rahti thi suraten unhen saaf dil se bhula diya
main vo murgh-e-khana-kharab huun ki chaman-e-qafs ka hai zikr kya
liya gar hasinon ne mol bhi mujhe sadqa kar ke uda diya
mera garche ‘aughat’ naam hai par karam hai ‘varis’-e-pak ka
zahe-shan dam men ghani kiya ki gada se shaah bana diya