main teri yaad men gum huun so main huun tu ho kar
ki jaise phuul men rahta huun us ki bu ho kar
phir aa ja aur ye tasvir le ke ja apni
tu ḳhud ko chhoḌ gaya mere ru-ba-ru ho kar
ye dil to roz nasheman saja ke rakhta hai
miri taraf se guzar tu bhi to kabhu ho kar
gulab sun to gul-andam aa raha hoga
dikha de samne us ke bhi surḳh-ru ho kar
tu chahta hai to siina yuun chiir ‘aḳhtar’ ka
ki chirne ko tujhe phir mile rafu ho kar
Leave a Reply