Kausar Niyazi
makḌi ke jalon men kab se qaid hain raushan-dan mire
haa.e kya sochenge ghar ko dekh ke kal mehman mire
ab ke baras to dil ki zamin par aag falak se barsi hai
fikr ki gandum ke danon se ḳhali hain khaliyan mire
meri zaban par maslahaton ke pahre hain to phir kya hai
haq ke alam-bardar hain ab bhi mazdur o dahqan mire
aaj hisar-e-dar-o-rasan men huun par aane vaala din
shahr ki divaron par chaspan dekhega farman mire
shakl-o-shabahat men be-shak kuchh farq zara sa tha varna
the to masiha bhi insan aur qatil bhi insan mire
bar-sar-e-am iqrar agar na-mumkin hai to yunhi sahi
kam-az-kam idrak to kar le gun be-shak mat maan mire
kal ‘kausar’ mere angan men raqs-e-baharan tha lekin
aaj taraste hain kaghaz ke phulon ko gul-dan mire
Leave a Reply