zaḳhm dil ka ḳhun-chakan aisa na tha
ab se pahle jan-sitan aisa na tha
larza-bar-andam hai qasr-e-yaqin
aadmi said-e-guman aisa na tha
phuljhaḌi si chhuTti thi rat-din
shahr-e-jan tira-nishan aisa na tha
phuul jo the aarzu ke jal ga.e
sho.ala sho.ala gulistan aisa na tha
ziist ki rah men bala.en thiin magar
mere sar par asman aisa na tha
shaḳh-e-gul thi titliyon ke par bhi the
gulshan-e-dil be-aman aisa na tha
Leave a Reply