chal base jo ki the jaane vaale
ab nahin phir ke vo aane vaale
mujh ko dikhla de mira akhtar-e-bakht
chand suraj ke banane vaale
log kahte hain tumhen rahat-e-jan
tum to ho dil ke dikhane vaale
ham se aur bar-e-musibat utthe
ham to hain naaz uthane vaale
teri rahmat hai ghazab par ghalib
roz-e-mahshar ke Darane vaale
kabhi bhule se idhar bhi aa ja
suune fitne ke jagane vaale
dil bhi mal Daal kabhi ‘anjum’ ka
are mehndi ke lagane vaale