aks kitne utar ga.e mujh men
phir na jaane kidhar ga.e mujh men
main ne chaha tha zaḳhm bhar jaa.en
zaḳhm hi zaḳhm bhar ga.e mujh men
main vo pal tha jo kha gaya sadiyan
sab zamane guzar ga.e mujh men
ye jo main huun zara sa baaqi huun
vo jo tum the vo mar ga.e mujh men
mere andar thi aisi tariki
aa ke aaseb Dar ga.e mujh men
pahle utra main dil ke dariya men
phir samundar utar ga.e mujh men
kaisa mujh ko bana diya ‘ammar’
kaun sa rang bhar ga.e mujh men
Leave a Reply