Hasnain Aqib
vaqt guzra hai tire hijr men aise janan
koi machhli bina paani ke ho jaise janan
ham ko ma.alum tha tu ḳhush hai bichhaḌ kar ham se
phir bhi ham shab men behad tiri ro.e janan
har guzargah tiri mujh ko thi manzil ki tarah
tu ne dekha nahin mujh ko kabhi muḌ ke janan
raah kanTon bhari gulshan men badal sakti thi
ek duuje ko kabhi ham jo samajhte janan
jin pe chalte the zamane ko bhula kar ham log
yaad karte hain hamen ab bhi vo raste janan
dil ke goshe men tha sanduq tiri yadon ka
kar diya hai use maazi ke havale janan
ab bhi rah rah ke mire dil men chamak uThte hain
tu ne dekhe the jo kuchh TuTte taare janan
kuchh to vo zaḳhm hain jo tu ne diye hain mujh ko
aur kuchh zaḳhm ki logon ne uchhale janan
apne milne ke zamane men hain qisse mash.hur
ham to do pal bhi kabhi saath na baiThe janan
ye ghazab hai ki ye asar qayamat ke hain
ek ma.asum mohabbat pe ye pahre janan
azma.ish hai kaḌi teri mohabbat bhi sanam
zulm har rang men ham ne tire dekhe janan
tera ye shahar to maskan hai hunar-mandon ka
baat badli hui badle hue chehre janan
murgh-e-bismil ki tarah jaise taḌapta huun main
tu bhi chahat men miri aise hi taḌpe janan
tere shanon pe yunhi haath rakha tha main ne
munjamid ho ga.e yadon men vo lamhe janan
main bhi kuchh vaqt na ruk paaya tumhari ḳhatir
tum bhi mere liye kuchh der na Thahre janan
tu nigahon men basa leti hamen to ham bhi
ashk ban kar tire galon pe luḌhakte janan
ham ne iqbal-e-mohabbat pe kahan jabr kiya
baat to baat thi tum baat hi sunte janan
tujh ko Dar hai tujhe mujh se na mohabbat ho jaa.e
mujh ko andesha ise sach na tu samjhe janan
apne milne ki nahin aaj bhi koi ummid
ek muddat hui halat na badle janan
Leave a Reply