Ain Tabish
vahi junun ki soḳhta-jani vahi fusun afsanon ka
uḌa uḌa sa bujha bujha sa rang vahi divanon ka
dariya to manus hai ashk-lahu ki ḳhud-sar maujon se
dasht tujhe ma.alum hai saara qissa in hairanon ka
chahat-bhar ummid rakhi hai aur raston-bhar pa-mardi
durveshon ke chal-chalan men rang hai sab sultanon ka
abhi nahin to ainda ham ḳhaak uḌane aenge
kaun sa kaam ruka jaata hai faqiron be-samanon ka
tu jo is duniya ki ḳhatir apna-ap ganvata hai
ai dil-e-man ai mere musafir kaam hai ye na-danon ka
Leave a Reply