tum hamare nahin to kya gham hai
ham tumhare to hain ye kya kam hai
baal bikhre hain aankh pur-nam hai
mar gaya kaun kis ka matam hai
husn ki shoḳhiyan zara dekho
gaah sho.ala hai gaah shabnam hai
muskura do zara ḳhuda ke liye
sham-e-mahfil men raushni kam hai
chha rahi hain ghaTa.en savan ki
zulf-e-gardun bhi aaj barham hai
ban gaya hai ye zindagi ab to
tujh se baḌh kar hamen tira gham hai
chaak daman hai kis liye gul ka
kis liye ashk-rez shabnam hai
mahfil-e-raqs ho ki sher-o-sharab
tum nahin ho to bazm-e-matam hai
har masarrat alam ka hai partav
jo ḳhushi hai amanat-e-gham hai
is men aansu bhi hain tabassum bhi
zindagi ik tazad-e-paiham hai
shaiḳh sahab jarahat-e-dil ka
aap ke paas koi marham hai
is ko sajde kiye farishton ne
aadmi hai ye ibn-e-adam hai
Leave a Reply