Nikla Hun Shahr-E-KHwab Se Aise Ajib Haal Mein

nikla huun shahr-e-ḳhvab se aise ajiib haal men

gharb mire junub men sharq mire shumal men

koi kahin se aa.e aur mujh se kahe ki zindagi

teri talash men hai dost baiTha hai kis ḳhayal men

DhunDte phir rahe hain sab meri jagah mira sabab

koi hazar miil men koi hazar saal men

lafzon ke iḳhtisar se kam to hui saza miri

pahle kahaniyon men tha ab huun main ik misal men

mez pe roz sub.h-dam taaza gulab dekh kar

lagta nahin ki ho koi mujh sa mire ayaal men

phuul kahan se aa.e the aur kahan chale ga.e

vaqt na tha ki dekhta paudon ki dekh-bhal main

kamron men bistaraon ke biich koi jagah nahin bachi

ḳhvab hi ḳhvab hain yahan a.ankhon ke haspatal men

gurg-o-samand o mush-o-sag chhanT ke ek ek rag

phirte hain sab alag alag rahte hain ek khaal men