hazar rang jalal-o-jamal ke dekhe
vo ma.arke tire husn-e-ḳhayal ke dekhe
samajh men aane laga maqsad-e-hayat-o-mamat
vo zaviye tire hijr o visal ke dekhe
har ek gham hai tar-o-taza pahle din ki tarah
amanaten koi yuun bhi sambhal ke dekhe
faza na bujhne lage is ḳhayal se akasr
dil o nigah ke raste ujaal ke dekhe
nagar bhi aur khanDar bhi nazar men rahte hain
ajiib daur uruj-o-zaval ke dekhe
ki rashk aane laga apni be-kamali par
kamal aise bhi ahl-e-kamal ke dekhe
na chashm ishare se vaqif na lab ka harf se rabt
kuchh aise silsile bhi qil-o-qal ke dekhe
zamin zamin na rahi aur falak falak na raha
kuchh aise marhale bhi arz-e-hal ke dekhe
koi sadi bhi hai pal aur koi pal bhi sadi
kuchh aise fasle bhi mah-o-sal ke dekhe
hui zamin kabhi raakh to kabhi gharqab
kuchh aise hausle bhi barshgal ke dekhe
ajiib shart hai in manzaron ki ai ‘ruhi’
ki apni ankhen koi ḳhud nikal ke dekhe
Leave a Reply