darvesh qaid-e-gham men dil-e-zar ho gaya
azad ho gaya jo giraftar ho gaya
yusuf bhi laakh jaan se kharidar ho gaya
tu ghar men ghul tira sar-e-bazar ho gaya
rakhna tariq-e-ishq men daala jo hijr ne
nasur dil ka rauzan-e-divar ho gaya
qatil ne qatl bhi jo subuk jaan kar kiya
lasha ba-rang-e-ruh subuk-bar ho gaya
ugla jo zahr afi-e-gesu-e-yar ne
har mu-e-mar-e-zulf-e-siyah maar ho gaya
soya hain vasl-e-shauq men jaaga vo naaz se
main be-khabar hua vo khabar-dar ho gaya
bhaga gaya na laash pe ghash kha ke gir pada
qatil ye mere khuun men giraftar ho gaya
ishq-e-sanam gale ka mire haar ho gaya
gardan ka taar rishta-e-zunnar ho gaya
paigham-e-vasl hi men khafa yaar ho gaya
iqrar ho gaya na kuchh inkar ho gaya
sham-o-sahar chamakne jo dagh-e-jigar laga
khurshid-e-roz-o-sham-e-shab-tar ho gaya
kar-e-rah-e-khuda na hua maut aa gai
ghaflat se banda dida-e-bedar ho gaya
qatil jo gul khilane laga shakh-e-tegh se
maqtal bhi dam men takhta-e-gulzar ho gaya
khodi jo nahr kohkan-e-jeb-e-chak ne
sau ja se tukde daman-e-kohsar ho gaya
yad-e-butan se kaaba-e-dil but-kada hua
tar-e-nafas bhi rishta-e-zunnar ho gaya
roya tulu-e-mehr-e-tan-e-ghaur par jo ‘arsh’
ab-e-ravan se jama-e-zartar ho gaya
Leave a Reply