Anjum Fauqi Badayuni
sochta rahta huun takmil-e-vafa kaise ho
aadmi bhi vo nahin hai to ḳhuda kaise ho
ishq ko hausla-e-tark-e-vafa kaise ho
lafz ma.ani ki sadaqat se juda kaise ho
main to puchhunga ki tum sab ke ḳhuda kaise ho
meri avaz farishton ki sada kaise ho
ek gham ho to bikhar jaa.e mire chehre par
ghair-mahdud masa.ib hain ziya kaise ho
sochne valon ki niyyat ko ḳhuda hi jaane
baat valon ko nahin fikr-e-vafa kaise ho
us ne majbur-e-vafa jaan ke munh pher liya
mujh se ye bhuul hui puchh liya kaise ho
ik sulagta hua dil tum se jalaya na gaya
jaane tum muḳhlis-e-arbab-e-vafa kaise ho
kis ki surat men nahin jalva-e-ḳhun-e-mazdur
ḳhun-e-mazdur ki qimat bhi ada kaise ho
ishq na-vaqif-e-adab-e-talab hai ‘anjum’
husn amada-e-iz.har-e-vafa kaise ho
Leave a Reply