milte hain muskura ke agarche tamam log
mar mar ke ji rahe hain magar sub.h-o-sham log
ye bhuuk ye havas ye tanazzul ye vahshaten
ta.amir kar rahe hain ye kaisa nizam log
barbadiyon ne mujh ko bahut surḳh-ru kiya
karne lage hain ab to mira ehtiram log
inkar kar raha huun to qimat buland hai
bikne pe aa gaya to gira denge daam log
is ahd men ana ki hifazat ke vaste
phirte hain le ke haath men ḳhali niyam log
baiThe hain ḳhud hi paanv men zanjir Daal kar
hairan huun buzdili ke hain kitne ghulam log
kis kis ka e’tibar karen shahr men ‘nafas’
chehre badal badal ke mile hain tamam log
Leave a Reply