Hina Abbas
jo bhi kahna tha vo an-kaha rah gaya
dil ka arman dil men daba rah gaya
umr bhar us ki janib main chalti rahi
phir bhi milon ka ye fasla rah gaya
yuun to duniya men sab kuchh hai mujh ko mila
sirf tu hi to mujh se juda rah gaya
apni kahta raha meri ik na suni
vo ḳhafa tha ḳhafa ka ḳhafa rah gaya
aa gaya lauT kar vo mire paas hi
mujh men phir bhi kahin ik ḳhala rah gaya
kya bata.un tumhen apni taqdir se
kya mila hai mujhe aur kya rah gaya
DhunDte DhunDte main kahin kho ga.i
vo bhi mere liye lapata rah gaya
manzilen mil ga.iin jaane kis ko ‘hina’
apni qismat men bas rasta rah gaya
Leave a Reply