Shakeel Azmi
apni hasti ko miTa duun tire jaisa ho ja.un
is tarah chahun tujhe main tira hissa ho ja.un
pa.elen bandh ke barish ki karun raqs-e-junun
tu ghaTa ban ke baras aur main sahra ho ja.un
duur tak Thahra hua jhiil ka paani huun main
teri parchha.in jo paḌ jaa.e to dariya ho ja.un
shahr-dar-shahr mire ishq ki naubat baaje
main jahan ja.un tire naam se rusva ho ja.un
aadmi ban ke bahut main ne tujhe sajde kiye
to ḳhuda ban ke mujhe mil main farishta ho ja.un
is tarah mil ki bichhaḌne ka tasavvur na rahe
is tarah maang mujhe tu ki main tera ho ja.un
itna bimar ki sanson se dhuan uThta hai
aa tujhe dekh luun aur dekh ke achchha ho ja.un
Leave a Reply