Poshak-E-Mohabbat Thi phaTi Humne Wo Si Di

poshāk-e-mohabbat thī phaTī ham ne vo sī dī

ehsās kī nagrī meñ khilā rañg-e-shahīdī

kis jabr kā narġha hai madīne kī riyāsat

ḳhāmosh hai kyoñ kyā hai koī ahd-e-yazīdī

ham girya ke phūloñ se girā Dāleñge ik din

dīvār ke pīchhe bhī hai dīvār-e-hadīdī

tum apne tasavvur se banāte ho jo misre

ye ham ne diye tum ko ḳhayālāt jadīdī

ye apnā tayaqqun thā ki mil jā.egī ‘manzar’

sayyad the so bhūle se bhī duniyā na ḳharīdī

Leave a Comment