Mujhe Bhul Ja

mire saqiya mujhe bhuul ja

mire dilruba mujhe bhuul ja

na vo dil raha na vo ji raha

na vo daur-e-aish-o-khushi raha

na vo rabt-o-zabt-e-dili raha

na vo auj-e-tishna-labi raha

na vo zauq-e-bada-kashi raha

main alam-navaz huun aj-kal

main shikasta-saz huun aj-kal

main sarapa raaz huun aj-kal

mujhe ab khayal men bhi na mila

mujhe bhuul ja mujhe bhuul ja

mujhe zindagi se aziz-tar

faqat ek teri hi zaat thi

tiri har nigah mire liye

sabab-e-sukun-e-hayat thi

miri dastan-e-vafa kabhi

tiri sharh-e-husn-e-sifat thi

magar ab to rang hi aur hai

na vo tarz hai na vo taur hai

ye sitam bhi qabil-e-ghaur hai

tujhe apne husn ka vasta

mujhe bhuul ja mujhe bhuul ja

qasam iztirab-e-hayat ki

mujhe khamushi men qarar hai

mire sahn-e-gulshan-e-ishq men

na khizan hai ab na bahar hai

yahi dil tha raunaq-e-anjuman

yahi dil charagh-e-mazar hai

mujhe ab sukun-e-digar na de

mujhe ab naved-e-sahar na de

mujhe ab fareb-e-nazar na de

na ho vahm-e-ishq men mubtala

mujhe bhuul ja mujhe bhuul ja