zamane ko ulfat ka dastur kar duun
main teri kahani ko mash.hur kar duun
tire samne ro luun ji chahta hai
tire dil ko bhi gham se main chuur kar duun
masiha ka ehsan nahin chahti huun
main zaḳhmon ko apne hi angur kar duun
mire ishq par koi tohmat na dharna
agar tum kaho ḳhud ko mansur kar duun
agar mil sake mujh ko ashkon ke badle
gham-e-ishq se ḳhud ko ma.amur kar duun
agar aankh bhar ke vo dekhe mujhe to
main dil us ki ḳhidmat pe mamur kar duun
gira duun main nafrat ki divaren saari
mohabbat ko duniya ka manshur kar duun
Leave a Reply