Zebunnisaa Zaibii
aḳhiri ab ḳhatm hone ko hai bab-e-zindagi
lo mukammal ho ga.i ‘zebi’ kitab-e-zindagi
likh rahi huun naam tere intisab-e-zindagi
sirf tu hai sirf tu hai intiḳhab-e-zindagi
rahaton ke aur ghamon ke saare mausam tujh se hain
tu jamal-e-fikr-o-fan tu aftab-e-zindagi
apne apne har amal ka goshvara saath hai
ab tumhare ru-ba-ru hoga hisab-e-zindagi
apni apni uljhanon men ab hain sab uljhe hue
ab nahin baaqi kahin ankhon men tab-e-zindagi
hai amal hi se mayassar rahat-e-qalb-o-jigar
ba-amal hai jo vahi hai kamyab-e-zindagi
ab na iḳhlas-o-muravvat hai na logon men vafa
kasrat-e-zar ne badal Daala nisab-e-zindagi
Leave a Reply